近日，我們同事間都好像多佐一個心----離心

 

無論是私低下，還是公開上，話題多數是同離開這裡有關....

 

到了現在，大家都好像沒有當初成立時的拼勁，開始返工等放工，月頭等月尾出糧，那個"Sign Up Chart"，我已經開始當佢透明，開佐幾多卡都吾會有咩開心感覺，只要吾會排第尾就ok，甚麼"卡王"名譽都開始不在乎，有時總會在office 度搵d 野做下來"dump 波鐘"，夠鐘就放 break，夠鐘就走人。

 

早前高層比佐個"希望"我地，但今日再去打聽，睇怕係短期內都吾會成事，還是當"無聽過"會比較好，或者我應該吾好再對他存有咁何幻想會比較好，是時候要醒覺……

捱下捱下，又到年尾，一到年尾就好自然會諗返自己今年做過d 乜，發生過d 咩事…

 

呢年發生ge事太多，都吾想再一一打出來，有喜有悲，從天堂到地獄，以為得佐，轉眼間又話比你知要從頭來過，呢種感覺真係吾想再受，太難頂la…

 

早派聽佐一個講座，講者好強調一句︰選擇比能力重要。

 

有時諗真下，呢句說話真係不無道理，好似家陣咁，每日返工都懷疑自己當初ge 選擇，就連選擇做一次好人都累到自己錯失機會，我諗呢期我最怕ge 應該係叫我做決定，因為我怕真係再次選擇錯誤。

 

問到我零九年有咩願望，我會答你一句︰希望吾會再選錯。

話咁快又過佐一個星期，今個星期六、日沒有任何節目，只有返工，返工&返工……

 

今日返工再睇下下個更ge 時間，發覺都係無任何改動，即係話我將要第一次係工作中渡過回歸日、冬至及聖誔節，如果你問我會吾會覺得好慘，我會比你ge 答案係︰我都吾知…… 因為吾駛返工又冇野做.. 要返工又有雙糧補償番，係經濟吾好ge 時候有錢搵當然最好la.... 但係係節日都吾可以休息下... 真係好hurt.....

 

 

話咁快又過佐一個星期.. 剛剛過去佐的週六是07/08年度澳門大學畢業典禮的大日子...

 

畢業禮後，我地jpc 全班同學相約食晚飯，大家都互相問下對方最近如何，好像大家都各自找到工作，不論是否滿意，但在現時的經濟環境，能夠有一份可滿足三餐的工，也算是過得去了...

希望我地呢屆jpc  每年都可以有類似的班聚，讓大家繼續維繫....(靠你啦.. 阿球)

 

晚餐過後，竟然難得星期日放假，當然不能白白錯過la.. 所以又係找節目ge時候，結果最後都係打雀，數一數，原來我一個月差吾多已經打佐五場麻雀，除佐上個星期五、六無打之外，差吾多每個星期五、六晚都是麻雀之夜... 不過來緊兩個星期五、六都冇機會打lu.. 因為...調佐更..要返工lor..

期待佐將近4個月，今日終於著上我地team ge 新制服，但所謂的"新制服"，只不過是別人以前的制服而已(以前著過的都話呢套制服好"七")，我地今次真係可以話合哂潮流，一於來個"廢物再利用"，無計la.. 鬼叫公司家陣吾夠錢咩，已經設計佐ge 新制服最終都"胎死腹中"，唯有來一招物盡其用，就係因為咁包括我在內，有幾位同事都搵吾岩size ge 外套，要攞件大d ge 然後攞去改…… 點都好la... 總算好過著套貢多拉ge.. 著住佢行關閘真係都吾知以後點行出來見人...

 

行到站頭，d 車務ge 反應各個吾同，有d 就話"咁型呀"，"咦？有新制服wor"，"好sharp呀"，"好gap 呀" … 但我只想講句︰套衫係二手貨，仲要係人地吾要哥隻......

 

今日個office 好熱鬧，除佐有新來ge part time 係度training 之外，仲有幾個係counter 幫人開卡ge 同事落佐來training，呢幾個同事為咩要來我地條team 令到我地好疑惑，因為聽講佢地只係來幾個星期，好快又會走人？

 

A君話佢地可能好快會升職，因為升佐之後需要head 住其他部門，所以要來知道下我地條team 做d 咩。呢個說法我比較質疑，因為如果只係要知道下我地條team 做d 乜，咁佢地ge training 就吾駛練我地ge script，仲見佢地係度苦惱緊點係車上同客講；

 

B君話佢地4個可能會係站頭度mark 我地上車時間，監視我地有冇蛇王。但呢個講法又有問題，同之前ge 一樣，如果係監視我地ge，咁駛乜練我地ge script， 同埋都吾會只係監我地幾個星期就算數la...

 

到今日收工時，呢個問題都仲係未有確實答案，只知來緊兩個星期佢地都會同我地一齊sell卡，做同一樣ge 野，而我只希望今次d super吾駛我幫手帶新人行番轉車，因為要帶一個年資比自己長，工作經驗比我多ge 同事去行總覺得好似吾知點樣咁... 怪怪地....

好多人都話我好少洗錢，但我今個月可能要洗多好多錢...因為︰買衫換季、整車、仲有學車....

 

突然間要洗咁多錢，當然需要一個可靠的財政來源，但家陣我的唯一財政來源就頻頻傳出負面消息，攪到我開始驚會吾會明天一返到去收到大信封，呢封吾係因為個人問題而收，而係公司問題而收的大信封.... 一諗到呢度，就開始懷疑自己當初的選擇究竟是對是錯....

 

呢期日日都向d 客派手機繩做紀念品，d 風趣ge 客一收到就會答一句︰係咪比我輸哂時用來吊頸ga？ 

有時真係想答番句︰咁我都應該留番條比自己等公司大裁員時候用....

     話快吾快，話耐吾耐，咁又過佐三個月ge probation，由第一日開工開始，就一直曈景過佐probation 之後會有人工加，或者有機會調到其他部門工作，所以一直都keep 住吾蛇王偷懶，交足功課，吾遲到call sick，少少吾舒服都頂硬上，但到今時今日，見到個市咁，睇來我ge 願望都要一一落空，開始懷疑自己先前做ge 決定到底係咪錯.....又或者係時不與我....

     加人工，有邊個打工仔吾想？但家陣咁ge 款，佢吾成條team cut 佐佢都算偷笑，雖然話要到出糧哥日先知有冇得加，但都打定輸數；至於轉部門，要做夠半年先可以，真係等到頸都長……現家返工，每日都好似係度開工等放工，月頭等月尾出糧咁...

6月22日，畢業晚宴終於來到，哥晚雖然得吾到任何奬品，但可以與班上咁多位同學一齊開開心心吃餐飯，真的好開心。

 

Din 完之後去佐唱k 癲番晚，當tracy 點佐首"我門的紀念冊"時，我第一樣諗到的，就是愁點整個同學錄，因為d photoshop 差吾多吾記得哂，加上個人係呢方面創作力低，都吾知點算好……

 

另外，當我地一齊唱首歌時，這4年的經歷晃忽覺得好像昨天發生的一樣，想不到這4 年真的這麼快就完結，過埋今晚，大家就要各奔前程，相信好難再會有機會咁大班人一齊hehe haha.... 所以要好好珍惜...

 

由做畢委會開始，我一直都無諗過要得到任何贊賞或多謝，因為我已得到一些好處，但竟然係臨走時聽到anthony 對我講佐句︰我知你為我地班做佐好多野…多謝﹗

 

呢一句，就是呢一句，當時我心裡暗暗歡喜，同時亦有d 慚愧，歡喜ge係自己做ge 事得到別人認同，仲使只得一個；而慚愧的是，我並未有盡責做我的班代表，好多訊息我都冇第一時間發比大家，在此都要同大家講聲對不起。

    今個星期三中午十二時三十分，上完劉銳紹的課，也代表著我四年大學生涯的課終於完結，接下來的就要考試&煩到死的project....

完成而又全部pass 的話就畢業。

    當聽到上完堂哥一刹那，竟興奮又有d 感觸，話哂大家都一起經歷4年的大學生活，有喜有悲，過埋今日後就再冇機會同大家一齊上堂，grad din 後大家就各奔前程，不知何時再可以相聚~~~ 相聚時吾知大家會吾會已經變哂阿叔阿嬸，假若係的話我相信到時攞番傳播週d dvd 出來播時，花絮前半段一定會好好笑，後半段或會仲喊得西利過傳播週閉幕哥日…

     要講4年大學印象最深刻的事，一定係傳播週，當年的事，仲記憶猶新，晄忽好似昨天的事，還記得我們如何爭場，爭banner 位，爭sponsor，爭宣傳，爭借機；每星期開會，遲到罰錢，開大會傾口號，拍宣傳片d 蝦look(大部分都係阿球的)，拍完之後趕片，studio 成為我地第二個家，晚晚食完飯就返去剪片，遲返ge 識做買宵夜…… 呢一切切，雖然除佐宣傳片，其他都沒有片留底做證，但早已刻在大家的記憶中……

     最後，祝大家畢業後都搵到好工.... 我們有緣再會...

不經不覺，四年的大學生涯就快畫上句號。係呢個時候突然間有d 吾捨得…

 

還記得中學時，不停想著希望自己可以快點大學畢業出來搵錢，到現家就快可以成真，但又一點開心都無..點解？

可能係我到現家都未搵到工…

可能係我以後都無聖誕、新年、暑假呢d 長假期放…

可能…

 

回想這四年大學，我得到甚麼？失去甚麼？ 一時間我都無法數得清… 只知道這四年過得很快… 不知不覺又過一個sem… 不知不覺又大一歲…

       九日，終於過佐呢九日，亞室運亦都告一段落。係呢九日裡，我學到的第一樣野就係︰所有野係要自己去爭取的，包括食飯。因為係我駐守ge 場可以話係咁多個場館中對志工待遇最差的一個，冇水供應，中午冇飯食，駐守時間超長。當然我絕對吾可以比呢d 情況發生係我身上，因此我每一日都會用對講機同威威or miki講︰中午有冇飯食？ 好在有佢地ge 體諒，肯充當送飯，我地呢班駐守係天花漏水的場館的志工先有番餐中午飯食，而且仲有水飲，在此真的要多謝他們。

        係呢九日， 除佐要多謝威威同miki 幫我地送飯外，還要多謝一班under 我ge 同事，對住我呢個leader中ge 新仔，都肯聽我點，真係要多謝你們。同你地一齊工作哥九日真係好開心，雖然又要早起，遲收工，有日仲要成十二點半先走得，又成日擔心無飯食，但係大家都過佐個難忘的亞室運，呢九日會成為大家一個美好的回憶。

     好耐冇打自己個blog，估吾到再打時已經到八月中，剛好從台灣實習完返來，不經不覺，廿三日ge 實習就過佐....

    今次ge 實習可以話幫我重溫我由大一開始學ge 野，初頭好多我都已然聽過或學過，搞到我上堂時都悶到訓佐吾少。到第二個星期始分組上課，諗住可以學番d 自己有興趣ge 野，點知頭哥兩日佢一尾係度得個講字，到最後兩日先開始有返d 我想學ge 野，唉.... 吾怪得之上屆d師兄話去到係冇咩學ga la...

    對於今次ge 實習，最大ge 收獲都係可以去睇人地點樣去做一個live ge 新聞，以及可以識到一班好好玩ge 香港朋友仔，肥基、阿嬸、jason、nick等等。好祈望可以好快又可以同你地一齊hehe haha~~~~~

    今日去睇醫生哥時見到有個磅係度，一時貪得意想睇下自己而家幾重，咁咪企上個磅度磅下，之後發覺自己原來比起三年前，即係剛中學畢業時重佐差吾多十磅，但係對住塊鏡望住自己又吾覺自己肥佐bor...究竟呢十磅係邊度出來ge 呢？

    時光飛逝，一連五日的傳播週活動在一片歡呼聲中告一段落，今次的校內實習活動真的令我畢生難忙，回想這三個多月，我們這一班同學仔由一盤散沙，傾甚麼都議而不決，甚麼都不懂，到最後大家都不再斤斤計較，願意付出比別人更多的時間落這個活動當中，犧牲搵錢時間。推廣組的努力搵贊助，出信邀請嘉賓，安排節目流程；傳人類組的積極發掘校園新聞，辦好今年的新聞雜誌--傳人類；至於我們的電視組，亦都為自己的作品--傳播週宣傳短片、三組的宣傳片、傳意聚焦 新聞片而努力，當然吾少得精彩的幕後花絮。

 

    講到幕後花絮，真係要多謝阿球，冇佢係度的話真係冇乜花絮好剪，難然我地幫佢起佐個外號叫--哂帶王，拍宣傳片係咁NG，搞到遲遲都收吾到工， 但諗真d 如果冇佢係度我地ge 拍攝工作就少咁一份樂趣，有佢係度令到整個實習變得冇咁悶，邊拍邊笑又過一日。

   

仲記得大二哥時聽到陳家樂博士話王家衛剪襯片都剪到開show 前先ok，睇怕我地都學佐佢咁，所有新聞片都係係deadline 前一晚搞掂，預告片仲要係零晨三、四點先做好(花絮係當天的朝早剪好)，之後仲要output，out 埋成五點鐘，離開studio 竟然見到陽光---即係我地又通頂。雖然這些日子確實吾好過，但係又過得好開心，一班同學夜晚係studio 剪片，個個當佐哥度係第二個家咁，係度開餐，食生果，甚至仲有同學做埋護膚，帶齊裝備去camp咁。做到咁上下就有人出去買野食，or 遲返的人識做買d 零食返來大家分享，可能因為係咁呢派studio 好似多佐d 小昆蟲.....  但個感覺幾warm，有你地一齊剪片的六個夜晚我過得特別開心。

 

    幕後花絮本來諗住分開兩部份，頭半部當然係d 搞笑ge shot 同蝦look 鏡頭，而下半部份我原意只係想大家可似係過佐n年之後攞返出來睇時都有一種懷念的感覺，但估吾到播佐之後有咁大ge 回響，大家都忍不住淚水，在此要同大家講聲對吾住。

 

    最後，當然要多謝所有幫過我們電視組的單位，胡sir 同miss lam，推廣組及傳人類的同學，以及大四的師兄們，冇你地ge 技術支援相信主播個shot同條聲 都無法搞好。組內ge 當然要多謝大導、van、肥銘等等一直為傳播週出力的同學。相信大家都同我一樣永遠吾會忙記我地於2007年春天係氹仔的一個小山岡上的所流過的淚與汗。

     三月都過佐一半，忙碌的日子又再來臨。

時間︰2007年2月9日晚上六時三十分

地點︰澳門大學東亞樓九樓平台

事由︰第九屆澳門大學學生會及其附屬組織就職典禮

        "謹以本人之名義立誓，在任其間，定必…… " 宣誓的一刻心情非常復雜，想不到自己可以站在台上，跟其他閣員一起宣誓，擔任總會之職務。但腦海中隨即而來的就是一堆又一堆的工作，怕自己力不從心，處理吾好，影響整個內閣，加上自己係總會還算是個新手，好多事仲需要其他資深閣員及上屆前輩多多提點。

唉....

最近都吾知行乜衰運...

 

今年都係過佐一個星期度je...

先後病佐一場，輸佐場麻雀，岩岩仲要被困(車立)tim...

 

點解會咁ga？？？？

2006快將完結，係時候同自己做番個小結︰

 

也許，我真的是太累，

也許，我真的要睡一睡，

每晚靈魂早已鑽進彼窩裡，

肉身還留在熒幕前……

 

或者，我還未夠火候，

或者，我還未夠資格做，

自受命於師，由如千斤重擔，

唯恐未能達成，以偒恩師之名。

 

間中，也會感到寂寞，

間中，也想找個人陪伴，

只因大敵當前，未敢多想，

兒女私情，還是聽天由命……

今晚終於得閒打下塊blog~~

繼係su成功選出新一屆領導機關成員之後，前派FSHSA亦都成功選出新一屆內閣，

作為現任FSHSA副會長的我，當然要在此恭賀一下新一屆內閣成功誔生。

 

仲有一個月多d就要離開呢個做佐年半ge 會，開展我係SU 的生涯，心情開始有點複雜，

話哂係入面做佐咁耐，無論係會房入面ge 一枱一櫈，壁佈上的每一張相，

都記錄住大家係呢年半以來的點點滴滴，有喜有悲，要離開了，總是有點吾舍得，

但這不是我一早應該預計到的嗎？為何我而家有這種心態，到底我是放不低，定還是另有原因？

 

半年前開始，已經有人開始問我做吾做下屆FSHSA，哥時我都仲係15./16緊，知道一旦如果應承，

就有機會做下屆會長，表面上我應該開心先係？但我完全冇呢個感覺，反而只知道如果我咁做，

就一定會步我呢屆會長ge 後塵，我當時就已經吾係好想咁做，加上自已亦都冇信心可以帶領現屆ge人。

直到年中有人組織新內閣參加下屆SU，問我有冇興趣，而且個post 仲吾係細，做副理事長，

我哥刹那ge 心情其實仲複雜，可以上SU當然好，起碼可以見識多d，而且係總會ge發揮一定比係屬會多，

但與此同時我亦擔心自己有冇這個能力，一個FSHSA 我已經搞到自己忙到死，莫講話係SU。

但係呢個係千載難逢ge 好機會，錯過呢次就冇機會，所以最後我都答應參加選SU。

 

選SU ge 過程可以用"好玩"來形容，做學生會咁耐從來未試過一班人去爭取一些野，而且當時仲傳言有好多組人參選，

過程中仲要保守秘密，吾可以亂同人講，講到呢度我要向FSHSAge 內閣講聲"對吾住"，忍瞞大家咁耐，

希望大家可以體諒，因為呢件不竟都吾係我一個人ge 事，係成個誠明閣23人ge 事，

應承得要保守秘密就吾可以失信於人前。

 

如今見到你地已經選出新一屆的內閣，開始著手下屆ge 事，我真係好開心，希望下屆FSHSA 可以做得比我地呢屆更好。

     返佐來咁耐，終於有心情係呢個blog 度發下牙痕，講兩句。

    

     係八月頭我同幾個來自澳門其他大專院校ge 同學參加佐個由香港學友社主辦ge "奧運龍情2006 香港、北京十四天交流團"，呢次係我第一次去咁長ge 交流團，之前都係4/5 日度，今次長逹十四日，第一件事令我覺得頭痛ge 就係洗衫問題，係香港時住係浸會大學個宿舍度都仲有自助洗衣機可以洗衫，但係係北京哥時，住係酒店度，就要自己用手洗，都覺得幾麻煩下，用手洗條牛仔褲都幾辛苦，就咁掛佢係房度都要等佢兩日先乾。

 

     係香港時終於一嘗到賣旗ge 感受，係尖沙咀度賣旗，人多ge 鬧市中，叫途人幫你賣支旗，原來都要講下運氣，同埋要識得睇人，因為有d 人一見到你走來賣旗就會調頭走，有d 就會主動幫你買支旗。係開始賣旗ge 時候，由於我冇呢d 經驗，我就搞一d 稍為衣著光鮮ge 途人去賣旗，之後慢慢發覺原來一d 拖住小朋友ge 家長都很願意買，但係反而白領一族就十個九個吾買，有d 仲會扮忙扮聽電話咁走佐去， 唉…月薪咁高ge 上班一族，為哥幾蚊雞駛吾駛咁呀？人地有幾個細路要養都買啦....

 

      坐火車上北京時坐硬卧車廂(三等廂)，由於地方淺窄，而且我訓在三層中的中間一層，可以話係最狹窄的一層，每次上去時都好似係度做體操咁，大家ge 行李又多，差吾多冇位可以再放，到夜晚時大家又坐埋一齊玩，差吾多十個人擠係一個廂裡，雖然地方好細，而且冷氣又吾多夠，但係大家都玩得好開心。

 

      到佐北京之後，大家第一樣最想ge 相信莫過去可以沖番一個靚涼，因為大家係火車度過佐成日，都冇沖過涼。但可惜我地吾可以即刻去酒店，還要到北京語言大學由當地的同學為我們"洗塵"，最後都差吾多搞到十點先可以返到酒店。返到酒店沖完涼本想好好訓番覺，但可惜吾可以，因為要為明晚ge 聯歡晚會做準備，而我今次仲被自己ge 團友推佐出來"祭旗"，做司儀。之後就同另外三位司儀一齊度下明晚d 台詞，搞掂之後再去採排我地澳門團ge 表演項目，最後都搞到成兩點幾先有得訓，第二朝仲要係六點半起身，哥時仲覺得有d 頭痛，唯有即刻食粒藥訓覺，希望明天可以冇乜事，吾係就大鑊…

 

      第二朝起身發覺自己好番好多，真係謝天謝地，可以繼續行程。個晚會大家都玩得好開心，等別係大家跳營舞哥時，雖然大家都開始有d 累，但都好落力咁跳，個個high 哂咁…真係好開心，如果係澳大d camp 都可以搞個類似咁ge 晚會就好啦…

 

      第三日我地有個乒乓球比賽，前兩日已經玩到咁累ge 我原本諗住今日吾駛出賽就可以好輕鬆咁過一日，但誓都估吾到當乒乓球比賽完佐之後北京哥面竟然話臨時加一場籃球賽，仲要係打全場哥種，要兩岸四地都派一d 人出來組隊打。係我地澳門方面，四個男仔當中，一個當時吾知去佐邊，一個去佐媾女，一個話做裁判，最後剩番我一個，毫無選擇ge 我唯有出來打。好耐都冇打籃球ge 我，一打仲要打全場，上半場都仲可以ge，下半場真係無能為力，夠力去守都吾夠力去攻。打完之後大家都一身汗，又冇衫換，唯有去買件北言大ge 衫著住先…

 

      "不到長城非好漢"，今日我終於來到長城，居庸關ge 長城比我想像中仲要難行，梯級ge 高度差吾多到我膝頭，加上當時天氣好大霧，我地個個都行到身水身汗。當行到頂時大家話要影番張來留念下。

 

      不知不覺，本來諗住係呢個blog 度講少少，結果而家都打佐一大堆野係度，今次就打到呢度為止，過幾日如果有心情ge 就打埋之後d 行程上來。